Khamoshi

Anjaane sheher mein ek ajnabi dariya ke kinare kuch purani yaadein laut aain, khoobsurat yaadein thin jo hothon par halki si muskaan chhod gayin, usey dekh dariya ne mujhse poocha kiski yaadein thin jo muskaan ban kar khil rahi hai tumhare chehre par? Main kuch kehta isse pehle dariya ne meri aankhon mein tumhari tasveer padhli; maine bhi thehre paani mein tumhari parchai dekhi aur chup raha...dariya bhi kuch bol nahi paayi...

Uska sheher

Ek baar fir uske sheher mein hoon. Kabhi ye sheher mera tha, ab sirf yahan basi yaadein meri hain, jo anginat lehron ki tarah takra rahin hain mujhse. Dum ghut raha hai mera, yahan ki fiza mein uski khusboo hai, uske kareeb hone ka ehsaas hai...kyon ye yaadein sirf mujhe satati hain? Ye uski bhi to hain...